Libong Mamamayan, Binigyan ng Tulong ng Holy Place Pentecost Church

DINGALAN, Aurora-Matagumpay na nagbigay tulong sa libo-libong tao ang sekta ng Holy Place Pentecost Church Tabernacle Inc. na pinangunahan ni Mommy Ruth Sanchez ang may bahay ni Rev. Eustaquio Sanchez ang nagtatag ng naturang simbahan.

Ang programa ng simbahan ay isinasagawa kada-taon sa bayang ito na kung saan mahigit limang libong katao ang nabiyayaan ng tulong bilang Pamaskong Handog para sa publiko.

Nakiisa sa nasabing palatuntunan ang ilang mga kilalang personalidad na lingkod bayan sa lalawigan ng Aurora na  sina Congresswoman Bellaflor Angara Castillo, Vice Gov. Rommel T. Angara, NYC Sherwin H. Taay, Bokal Cesar “Doc” Pimentel, Mayor Zenaida Padiernos, ang kinatawan ng Aurora Provincial Philippine National Police Office na si Provincial Director Elmer C. Bantog at maraming iba pa.

Kasabay nito ang pagbibigay rin ng tulong ni CongressWoman Bellaflor Angara Castillo sa batang ulilang lubos na pinagkalooban niya ito ng Scholarship program.

Pinasalamatan ni Mayor Zenaida Padiernos si Mommy Ruth dahil sa walang sawang pagtulong nito sa mga mamamayang nangangailangan ng kalinga sa bayan ng Dingalan.

Todo rin ang pasasalamat ng mga taong nabiyayaan sa naging programa ng nasabing simbahan gayundin ang kanilang kagalakan dahil malaking tulong umano sa kanila ang ganitong aktibidad. 

Nagpaabot naman ng mensahe ng pasasalamat si Mommy Ruth sa publiko da hil sa mainit na pagtanggap sa kanya ng mga tao.

Dasal din nito na nawa’y magkaroon ng kapayapaan at pagkakaisa ang mga namumuno hindi lamang sa bayan ng Dingalan kundi sa lalawigan ng Aurora. (Nelvie Broncate, CLMA News)