Problema sa Basura, Binibigyang Solusyon

BALER, Aurora-Personal na pinag-aaralan ngayon ni Baler Mayor Nelianto “Pilot” C. Bihasa ang pamilihang bayan ng Baler kung paano mabibigyang solusyon ang malaking problema sa basura na inirereklamo ng mga nagtitinda at mga mamimili.

Sa pahayag ng ilang nakapwesto sa pamilihang bayan, nakakasuka na raw ang masangsang na amoy ng mga basura na ilang araw ng nakatambak doon.

Ayon sa Municipal Environment and Natural Resources ng nasabing bayan, bukod umano sa wala ng lugar na pwedeng pagtapunan ng mga basura na nagmumula sa iba’t-ibang brgy. ay hirap pa daw silang paghiwa-hiwalayin ang mga sukal na nabubulok at di nabubulok na dapat daw ay pinapraktis ng mga mamamayan.

Ayon naman kay Bihasa, sa ngayon ay sa tambakan muna ng basura ng Maria Aurora pansamantalang itatapon ang mga sukal ng Baler habang naghahanap pa ng lugar na pwedeng pagtapunan ang lokal na pamahalaan.

Nanawagan din si Bihasa na sa bahay pa lamang ay gawin na ang tamang paghihiwa-hiwalay ng mga basura upang tuluyan na itong masolusyunan. (Ferdinand Pascual)