Pasada ng mga Pampublikong Van at Bus, Balik na sa Normal

BALER, Aurora-Nagbalik na sa normal kahapon ang biyahe ng mga Van at Bus sa sa bayang ito matapos ang apat na araw na todong pamamasada ng mga ito simula noong bagong taon.

Ayon sa mga dispatcher ng Baler Transport Terminal, hindi na sila ngayon hirap sa pag-aasikaso sa mga mamamayan sa Aurora na nagnanais na makabiyahe palabas ng lalawigan.

Magugunitang dumagsa ang napakaraming biyahero sa mga terminal ng Van at bus sa bayang ito nitong nakaraang araw na kung saan nag-aagawan ang mga ito sa pila ng sasakyan upang makaalis kaagad at makauwi sa labas ng lalawigan samantalang ang iba ay natulog na sa terminal upang makasakay agad sa sinumang mauunang aalis na pampasaherong sasakyan.

Madami ring mga kolorum na sasakyan ang nagsakay at namasada nitong nagdaang mga araw samantalang ang iba ay nag-arkila na ng mga Van.

Depensa naman ng mga kolorum na namamasada, hindi na kayang suportahan ng mga lehitimong pampasaherong sasakyan ang biglaang pagdagsa ng mga tao kaya tumulong na lamang sila para makauwi ng mas maaga ang mga biyahero. (Bagong Aurora Website ng Bayan News Team)