DOLE at ASCOT nagdaos ng career summit

BALER, Aurora, April 8, 2012-Nagsagawa kamakailan ang Department of Labor and Employment (DOLE), sa pakikipagtulungan ng Aurora State College of Technology (ASCOT), ng una nitong career summit sa lalawigan. 

Sa temang, “Choosing the Career You Dream For the future (Ang Pagpili ng Karerang Pangarap Mo Para sa Hinaharap),” nilahukan ang summit ng Aurora National Science High School, Baler Essential Adventist Academy, Baler Institute, Baler National High School, at Calabuanan National High School. 

Dumalo ang may kabuuang 162 mag-aaral sa ika-apat na taon ng sekondarya sa summit na umaasang magagabayan sa pagpili ng mga tamang karera sa kanilang pag-aaral sa kolehiyo. 

Sa kanyang mensahe, hinikayat ng pangulo ng ASCOT na si Dr. Eusebio V. Angara ang lahat ng mga mag-aaral na magko-kolehiyo na ituon ang isip sa pagkamit ng kanilang mga pangarap sa pamamagitan ng pag-aaral nang mabuti. 

Nagbigay naman ng pananalita si Antonio M. Mutuc Jr. ang pinuno ng DOLE-Aurora Field Office sa karera at pagtuturo ng trabaho at sa kaalaman sa labor market. 

Tinalakay ni Mutuc ang mga paksa sa tamang mga hakbang sa pagpili ng tamang karera ng mga mag-aaral sa pagbibigay ng tama at napapanahong kaalaman sa kasalukuyang merkado sa trabaho. (Jojo S. Libranda)